حورية فرغلي : عظام قفصي الصدري اختفت ولا أحد يرغب في الزواج بي

كشفت الممثلة المصرية، حورية فرغلي، عن اختفاء جزء كبير من عظام قفصها الصدري، بسبب العمليات التي خضعت لها في أنفها.

وقالت فرغلي في تصريحات صحافية جديدة: ”خلاص ما بقاش عندي عضم في القفص الصدري علشان أحطه في مناخيري، والحمد لله إني بقيت أشم وأتذوق، ولسه فاضل لي عملية واحدة في شيكاغو، لكن أنا راضية حاليًا بشكلي، ووصلت لحالة من الصفاء، واللي عاجبه عاجبه واللي مش عاجبه يغير المحطة“.

وأضافت الممثلة المصرية لموقع ”القاهرة 24“: ”محدش بيكلمني زي الأول، لكن رانيا محمود ياسين معايا على طول، وصفية العمري ونبيلة عبيد ولطيفة ومادلين طبر كانوا بيكلموني أول ما رجعت من أمريكا، لكنهم انشغلوا ومابقاش عليا إقبال في الشغل“.

كما لفتت: ”أنا مش بتعرض غير للظلم في حياتي، في العمليات والمرض، والناس اللي بطلت تكلمني وتشغلني، ومحدش هامُّه بمثّل كويس ولا لأ، لكنهم شبهوني بمايكل جاكسون وقالوا مناخيرها شبه أبو الهول، وزعلانة إن محدش بيقول إني ممثلة شاطرة، لكنهم بيقولوا شكلها عامل إزاي وعاملة عمليات تجميل ولا لأ، وحطوا صورتي أنا وأبو الهول وقالوا ما الفرق، رغم إن حاجة تشرفني إنهم يشبهوني به، ومايكل جاكسون كانت الناس بتعشقه علشان موهبته وصوته ومحدش كان بيهمُّه شكله“.

وبشأن غيابها عن المشاركة في العديد من الأعمال الفنية، علقت حورية فرغلي: ”مش بيتعرض عليا أعمال كتير زي الأول، لأن أنا مشكلتي إني ماليش علاقات في الوسط، وهمَّا كلهم في علاقات وتجمعات وماحدش بيعزمني في أفراح، ومش بحب أروح المهرجانات إلا لو عندي فيلم أو رايحة أتفرج على حاجة، وكنت أتمنى طبعًا أحضر مهرجان القاهرة السينمائي لكن ما جتليش دعوة“.

وأوضحت حول حياتها الخاصة: ”أنا متجوزتش ومخلفتش ونفسي أعيش قصة حب، لكن محدش بيتقدم لي، وأنا أهم حاجة عندي الإنسان من جوه، وعمري ما فكرت في شكله، لكن الأهم يكون قلبه كويس ويراعي ربنا فيا ومايخوّنيش، ومش عارفة لسه موجود الصفات دي ولا لأ لكني سايباها على ربنا“.

وعبرت فرغلي عن غضبها بعد التنمر الذي تعرضت له الفنانة ميرفت أمين بعد انتشار صورة لها بملامح تبدو كبيرة في السن، قائلة: ”أكتر حد شعر بيها، وأحب أقول للناس إن الشكل أو السن عامة هما الحاجة الوحيدة اللي ما نقدرش نهرب منها، لكن البني آدم من جوه بيفضل زي ما هو، لو نقي بيفضل وجماله الداخلي بيظهر على وشه، وهي مرت بظروف وحشة وقاسية وصحابها الأنتيم ماتوا وبقت لوحدها، وكفاية حالتها النفسية.“